«  Փետրվար 2020  »
ԵրկԵրքՉրքՀնգՈւրբՇբԿիր
     12
3456789
10111213141516
17181920212223
242526272829

Яндекс.Метрика

Արմեն Խաչատրյան. Ռոբերտ Քոչարյանը ստում է (տեսանյութ)

Արմեն Խաչատրյան. Ռոբերտ Քոչարյանը ստում է (տեսանյութ)

Լևոն Տեր-Պետրոսյանի ղեկավարած Հայ ազգային կոնգրեսի ներկայացուցիչ Արմեն Խաչատրյանը, «Ազատության» հետ զրույցում, պնդում է, որ երեկ դատարանում Մարտի 1-ի գործով գլխավոր ամբաստանյալ Ռոբերտ Քոչարյանը ստեց, երբ խոսեց 2008-ի մարտյան իրադարձությունների ժամանակ մայրաքաղաքում կատարված սպանությունների քննության մասին։

«Ես ունեմ ողջամիտ կասկած, որ Ռոբերտ Քոչարյանը պարզապես ստում է՝ փորձելով փրկել իր կաշին։ Ես կարծում եմ, որ սպանությունների մասով նախաքննական մարմինը կատարում է անհրաժեշտ քննչական և օպերատիվ գործողություններ, որպեսզի հայտնաբերի։ Եվ հենց որ հայտնաբերեց, ես վստահ եմ, հասարակությունը իմանալու է այդ մասին։ Իսկ այդ սպանությունների հանգամանքները ևս մեկ անգամ ապացուցելու են, որ սպանությունները կատարվել են մեծ հաշվով Ռոբերտ Քոչարյանի հրամանի արդյունքում»։

Նախկին նախագահը չէր կարող իմանալ, թե Հատուկ քննչական ծառայությունը մասնավորապես սպանությունների բացահայտման ուղղությամբ ինչ տեղեկատվության է տիրապետում՝ դա նախաքննական գաղտնիք է. հայտարարում են Արմեն Խաչատրյանն ու Մարտի 1-ի 9 զոհերի իրավահաջորդների ներկայացուցիչ, փաստաբան Տիգրան Եգորյանը։

Արմեն Խաչատրյանը պնդում է, որ Քոչարյանի երեկվա ելույթը պարզապես սադրանք է.

- «Մենք տեսանք, որ վերջին օրերին ընթացքում պաշտպանական կողմը անընդհատ փորձում էր ստանալ նյութերը նախաքննական մարմնից, և դատարանը մերժեց տրամադրել։ Հիմա իրենք գնում են պարզ, սովորական պրովոկացիայի, որպեսզի էդ նյութերը հրապարակվի, և նրանք փորձեն ինչ-որ բաներ գտնել։ Եթե ունենան շատ հավաստի ապացույցներ, շատ հավաստի տեղեկություններ, որ, օրինակ, տասը սպանությունները էդ հրապարակում կատարվել են կենցաղային հողի վրա, վստահ եղեք, որ էս պահին դրանք արդեն հրապարակված կլինեին»։

Տիգրան Եգորյանի կարծիքով, նրան (Քոչարյանին) չեն կարող հասանելի լինել բուն գործով քննության գաղտնի տվյալները.

 «Ցուցմունք չի տալիս։ Իր իրավունքն է՝ որպես հասարակ մահկանացուի։ Բայց որպես մարդու, որը հավակնում է կրել երկրորդ նախագահ տիտղոսը, կարծում եմ, որ մտածելու բան կա։ Ես կարծում եմ, որ նա տիրապետում է և՛ նախաքննության համար, և՛ այս դատաքննության համար էական տվյալների և տեղեկատվության»։

Եգորյանը նաև պնդում է, թե սպանությունների բացահայտումը որևէ կերպ չի կարող բացառել կամ նվազեցնել նախկին նախագահին առաջադրված մեղադրանք. 

«Այս նշած հանգամանքները, սպանությունների հետ կապված հանգամանքների պարզումը ոչ մի կերպ ունակ չի նվազեցնելու Ռոբերտ Քոչարյանի պատասխանատվությունը և իրեն առաջադրված մեղադրանքը»։

Հայ ազգային կոնգրեսի ներկայացուցիչը հավելում է, թե սահմանադրական կարգի տապալման համար մեղադրվող Քոչարյանի մեղադրանքը ուղղակի կապ ունի սպանությունների հետ.

 «Էստեղ մոտիվը եղել է իշխանության պահպանումը և փոխանցումը։ Գործողությունը եղել է սահմանադրական կարգի տապալման միջոցով՝ զինուժ ներգրավել, ապօրինի զինված խմբավորումներ ներգրավել այդ գործողություններին, և արդյունքում զոհվել են տասը քաղաքացիներ»։