Ավարտվեց դատավորների արտահերթ ժողովը (ուղիղ)
Րոպեներ առաջ ավարտվեց դատավորների հրավիրած խորհրդաժողովը, որը տևեց ավելի քան վեց ժամ:
Դատավորների հեռանալուց հետո Վճռաբեկ դատարանի նախագահ Երվանդ Խունդկարյանը լրագրողներին ներս հրավիրեց՝ հայտարարություն անելու: Նա ասաց, որ ժողովը հրավիրվել էր ՀՀ-ում դատավորներից վաթսուներկուսի պահանջով: Խուդկարյանը նաև հավելեց, որ այսօրվա ժողովին մասնակցել է 165 դատավոր։
Խունդկարյանն ընթերցեց Ընդհանուր ժողովի հայտարարության տեքստը.
«Դատավորների ընդհանուր ժողովը ողջունում է դատական իշխանության նկատմամբ վստահության ամրապնդման վերականգման ցանկացած միջոցառում, որը սահմանված կլինի օրենքով»,-ասաց նա և նշեց, որ կոչ են անում օրենսդրական նախագիծ մշակել՝ այն բխեցնելով ՀՀ Սահմանադրությունից, միջազգային պարտավորություններից:
Հայտարարության տեքստում նշված է, որ ցանկացած առողջ ողջամիտ քննադատություն ընդունելի է դատական իշխանության համար, բայց դա չի կարող ուղեկցվել դատավորների պատիվն ու արժանապատվությունը արատավորող, դատական իշխանության հեղինակությանը վնասող արտահայտություններով, ուստի խստորեն դատապարտվում է ցանկացած անհարգելից գործողություն:
«Դատավորների ընդհանուր ժողովը արձանագրում է, որ Բարձրագույն դատական խորհրդի անգործությունը չի արտահայտում դատավորների հավաքական կամքը, և այդ մարմինը գործնականում չի երաշխավորում դատավորների անկախությունը»,-ասաց նա և նշեց, որ հայտարարությունն ընդունվել է երկար քննարկումների, բազմակարծության արդյունքում