«Այն ռեկտորները, որոնք ուսանողների վրա դռներ են փակել, նոր Հայաստանում անելիք չունեն»
Կրթական համակարգը պետք է ամբողջովին ապաքաղաքականացնել՝ սկսած բուհականից մինչև դպրոցական համակարգ։ Այսօր կառավարության արտահերթ նիստում այս մասին հայտարարեց ՀՀ վարչապետ Նիկոլ Փաշինյանը՝ խոսելով կրթական համակարգում անհրաժեշտ բարեփոխումների մասին.
«Պետք է շատ հստակ ասենք՝ այն ռեկտորները, որոնք բարձրագույն կրթական համակարգը դարձրել են ինչ-որ կուսակցական բջիջներ, այն ռեկտորները, որոնք ուսանողների վրա դռներ են փակել, նոր Հայաստանում անելիք չունեն: Սա իմ հստակ դիրքորոշումն է: Մենք չպետք է վախենանք այդ դիրքորոշումը հայտնել: Թող դռները ճանկռեն, իրենց սեղաններն ու բազկաթոռները ճանկռեն, բայց նոր Հայաստանում անելիք չունեն: Թող գնան իրենց համար գտնեն այլ աշխատանք, անելիք, առաքելություն»,– ասաց վարչապետը և հավելեց, որ սա քաղաքական որոշում է և վաղ թե ուշ պետք է իրագործվի:
Փաշինյանն անդրադարձավ նաև կրթական ծրագրերի վերանայման խնդրին` մասնավորապես նշելով կրթական առարկաներում կրկնությունները վերացնելու հարցին։