Բորել. Փաշինյանը Հայաստանի առաջին ղեկավարն է, ով ընդունել է Արցախը որպես Ադրբեջանի բաղկացուցիչ մաս
Մոլդովայում կայացած հնգակողմ հանդիպման ժամանակ Հայաստանի և Ադրբեջանի ղեկավարները ճանաչել են միմյանց տարածքային ամբողջականությունը. Հայաստանն ընդունել է Արցախը որպես Ադրբեջանի բաղկացուցիչ մաս, ընդ որում` Նիկոլ Փաշինյանը Հայաստանի առաջին ղեկավարն է, ով արել է նման հայտարարություն, և ԵՄ-ն հույս ունի, որ պաշտոնական Բաքուն կընդունի այդ մեսիջը և ավելի մեծ ուշադրություն կդարձնի Լեռնային Ղարաբաղի բնակիչների իրավունքներին ու անվտանգային հարցերին։
Նման հայտարարություն է արել ԵՄ դիվանագիտության ղեկավար Ժոզեպ Բորելը Եվրոպական խորհրդարանում «Հայաստանի և Ադրբեջանի միջև հարաբերությունները և Լեռնային Ղարաբաղում ու Լաչինի միջանցքում տիրող իրավիճակը» թեմայով քննարկման ժամանակ:
Բորելը նշել է, որ Լեռնային Ղարաբաղում սոցիալ-տնտեսական իրավիճակը բավականին լուրջ է։ Ըստ նրա՝ այդ իսկ պատճառով վերջին 2 տարիներին ԵՄ-ն իրականացրել է տարբեր նախաձեռնություններ՝ տեղի բնակիչներին մարդասիրական աջակցություն ցուցաբերելու համար, արդեն հատկացվել է 70 միլիոն եվրո։
Նա պատասխանում է պատգամավորների հարցերին, որոնք վերաբերում են Ղարաբաղում ստեղծված հումանիտար ծանր իրավիճակին, Լաչինի միջանցքի արգելափակմանը, որը Ադրբեջանը չդադարեցրեց անգամ միջազգային դատարանի որոշումից հետո, Հայաստանում տեղակայած Եվրամիության քաղաքացիական առաքելության գործունեությանը, Հայաստանի և Ադրբեջանի միջև հարաբերությունները կարգավորելու համար ԵՄ գործադրած ջանքերին, տարածաշրջանում ռուսական խաղաղապահների ներկայությանը, Ադրբեջանի հետ էներգետիկ ոլորտում Եվրամիության համագործակցության հնարավոր ազդեությանը Բրյուսելի դիրքորոշման վրա։
Պատասխանելով հարցին, թե Ղարաբաղի շրջափակումը շարունակելու, Լաչինի ճանապարհը չբացելու Եվրամիությունն ինչո՞ւ ավելի կոշտ քայլերի չի դիմում Բաքվի նկատմամբ, Ժոզեպ Բորելն ասաց, որ Միությունն ավելի վաղ հայտարարել է, որ Լաչինի միջանցքում անցակետի տեղադրումը չի նպաստում վստահություն կառուցելու ջանքերին, բայց Լաչինի միջանցքը դուրս է Հայաստանում տեղակայված Եվրամիության դիտորդական առաքելության պատասխանատվությունից, որ Եվրամիությունը խնդրել է Ադրբեջանին բացել միջանցքը. - «Բայց մենք չենք կարող ուժով ստիպել», - հավելել է նա։
ԵՄ-ն փորձում է կարգավորման հասնել բանակցությունների ու երկխոսության միջոցով, ասել է եվրոպացի պաշտոնյան՝ հիշեցնելով, որ վերջերս Մոլդովայում երկու երկրների առաջնորդների հետ հանդիպեցին Ֆրանսիայի նախագահը, Գերմանիայի կանցլերը, Եվրոպական խորհրդի նախագահը, և ևս մեկ հանդիպում նախատեսված է հուլիսին Շառլ Միշելի հետ Բրյուսելում։
Մոլդովայում կայացած հնգակողմ հանդիպման ժամանակ Հայաստանի և Ադրբեջանի ղեկավարները ճանաչել են միմյանց տարածքային ամբողջականությունը. Հայաստանն ընդունել է Արցախը որպես Ադրբեջանի բաղկացուցիչ մաս, ընդ որում` Նիկոլ Փաշինյանը Հայաստանի առաջին ղեկավարն է, ով արել է նման հայտարարություն, և ԵՄ-ն հույս ունի, որ պաշտոնական Բաքուն կընդունի այդ մեսիջը և ավելի մեծ ուշադրություն կդարձնի Լեռնային Ղարաբաղի բնակիչների իրավունքներին ու անվտանգային հարցերին։
Հիշեցնենք` դեկտեմբերի 12-ին քաղաքացիական հագուստով մի խումբ ադրբեջանցիներ բնապահպանական պատճառաբանությամբ փակեցին Արցախը Հայաստանին կապող Ստեփանակերտ-Գորիս մայրուղին, որտեղից հեռացան ապրիլի 28-ին։ Մինչ այդ` 2022 թվականի փետրվարի 22-ին, Արդարադատության միջազգային դատարանը Ադրբեջանի նկատմամբ հրատապ միջոց կիրառեց` պարտադրելով ապաշրջափակել Լաչինի ճանապարհը։ Այս որոշումը ոչ միայն չկիրառվեց, այլև ապրիլի 23-ին Ադրբեջանն անցակետ տեղադրեց Լաչինի ճանապարհի վրա` այն ամբողջությամբ առնելով իր վերահսկողության տակ։